Eggers, Falko

Nu hett mi ok de Gripp tofaten kregen. So´n Schiet, ik woll nu jüst mit de nee Geschichten

anfangen. Ik versök dat eenfach maal, villicht fallt mi wat in. Nah´n Dokter brukst du jo nich mehr

hengahn, denn neegsten Termin harrn se för mi in Juni. Wenn du Pech hest, büst du in de

Twüschentiet jo dreemaal afnippelt...in Februor schullen se mi Bloot afnehmen, dor hebb ik dree

Weeken op tövt. Trurig wat hier bi us los is!

Is egaal, ik smiet mi nu twee Koppkehltabletten in un denn geiht los. Beten wat över Ostern, dat

passt nu goot in de Tiet. Wiehnachten is knapp vörbi und glieks sünd de Geschäften vull mit

Ostersnuckereen. Mienswegen geern, ik eet meist Chips un Würmers, de gifft dat gaanze Johr.

As ik lütt weer, konn ik dat mit denn Osterhaas nich verstahn. Wo schull dat allens funktioneern?

Wi harrn nevenbi so´n beten Buuree, wie dat fröher faken so weer. Un de Höhner hebbt de Eier

leggt, ik hebb goot oppasst un weer mi dor teemlich seker. Achtern Huus stünd de Kanienkenstall

un jeeden Dag hebb ik de Haasen wat to freten geven. Besünners in de Weekens vör Ostern hebb ik

jem genau beobacht un faststellt: Mit dat Eierleggen haude dat nich so recht hen. Harrn wi villicht

ne dat richtige Fudder? Ik hebb jem denn wat vun us Höhner afgeven, hett ok nix hulven.

Ik wuss jo ok nich, weern bi de Haasen bloots de Fronslüüd för de Eier tostännig? Mach ween un wi

harrn allens Keerls in usen Stall. Denn weer´t jo keen Wunner. De heten ok all Hoppel, Moppel un

Schnuffel un nich Tapsi, Stupsi un Mimi. Vörsichtshalver hebb ik denn us Muddern utfraagt. Se hett

lacht un meende denn, dat bloots de Haasen de free rumloopt, dat mit de Eier op de Reeg kriegt. Dat

lüchte mi in. Use Jungs weern jo inspeert, de konnen de Eier denn jo gor nich verdelen. Aver

gediegen bleev dat doch. Wo güng dat mit de gaanze Logistik? Geev dat denn bloots een eenzigen

Osterhaas? Dat weer för em doch nich to schaffen. Wenn dat mehrere weern, güng dor denn nich

masse dörnanner? Naher kregen manche Kinner nix af un de annern dat Duppelte. Dat weer

bestimmt nich eenfach. Un de Eier weern doch week un Farv brukten se ok noch. Obwoll, dat

maakten bestimmt de ölleren Haasen. To´n Verdeelen weern de jo nich mehr so goot to Foot. Wenn

bi us de Paketdienst kummt, sünd dat ok jo jümmers junge Bengels, bi de Haasen nix anners. Aver

de Paketmann hett een Auto un de Haas bloots een Korf op sien Puckel. Dat is nich goot för sien

Gelenken un en Bandschiebenvörfall weer bestimmt nich wiet.

Mi weer dat denn ok egaal. Jümmers wenn wi an Ostersünndag in Goorn gahn sünd, legen de Eier

to de rechte Tiet unner de Büschen. Dat weer de Hauptsaaken. Aver een Haas mit een Korf op´n

Puckel woll mi nich richtig in Kopp. Veel Eier passten dor doch ok nich rin. Un flögen de bi dat

Gehoppel denn nich dör de Gegend? Wohrschienlich hebbt de domaals ok all ehre Ladung mit een

Spanngurt afsekert.

As ik denn öller weer, güng dat jedet Johr to´n Osterfüür. Faken bi de Füürwehr un af un to ok

privaat. Eenmaal sünd wi bi een Kumpel in Seekenhüsen inlaad ween. Ik weet noch, dat weer

bannig koolt un dor leeg ok noch so´n beten Snee. Dor hulf nix as onnich innerlich inrieben. Beer,

Sluck un Glöhwien, jümmers afwesselnd. Jeden harr een annern Buddel, konn jo ne gootgahn.

Koolt weer mi denn bold nich mehr, aver stahn un snacken woll nich mehr so recht. Dicht bi stünd

een Bank, dor hebb ik mi denn hensett. Twüschendör geev´t wat to drinken. De Rest fehlt mi

denn...de hebbt mi woll mit een Schuufkoor na Huus föhrt, ünnerwegens hebb ik miene Schoh

verloren un us Muddern hett woll sputtert: ,, De wakt nich wedder op, de wakt nich wedder op."

Bün ik aver denn doch noch.

Ik wünsch jo schöne Fierdaage un fallt dor nich bi um.