Eggers, Falko

Ik lev jo alleen un bruk egentlich ne veel, aver af un an mutt jo jeden ok maal wat inköpen. Ik gah

jümmers in denn sülvigen Levensmiddelladen in Erkshoff, dor weet ik nu Bescheed wo miene

Saken to finnen sünd. Veel Afwesselung gifft bi mi nich. Ik woll betahlen un stünd inne lange

Slangen, achter mi bölkte al eenen, dat em dat to lange duurte. Nu weer ik anne Reeg un de junge

Kasseerer fröög mi, ob ik denn een ,,Düütschlandkoorten" harr. Wat meende he denn dormit? Een

Koorten vun us Gemenen un to Not mien olen Diercke-Schoolatlas legen bi mi to Huus in

Afstellruum, aver ik hool mi jo meisst eher dichte bi op. Woll de Keerl in Urlaub föhrn? Geiht dat

vondaage nich allens mit´n ,,Navi"? He verdreihde de Klüsen un fröög mi wieter na ,,Treuepunkte",

de ik doch mit mien ,,Paybäckkoorten" inlösen konn. Wat snackte de denn vun Tüünkraam? Ik woll

jo bloots inköpen un nix anners... un miene leste "richtige" Koorten hebb ik kregen, as us Omma

inne achtiger Johren to Kur in Bad Sooden-Allendorf wesen is. Denn füng he an vun een ,,Äpp" op

mien Handy to snacken, dordör konn ik masse Geld sporen. Dat ik mien Handy bloots to´n sabbeln

brukte, hebb ik em denn nich mehr vertellt. Un worum maakt de nich glieks reelle Priese? Denn

weer allens veel eenfacher....ik hebb denn flink mien Pottmonee ut de Büxentaschen friemelt, mit

"richtiget" Geld betahlt un bün utknepen. Fröher usen ,,Tante-Emma-Laden", wat weer dat schön.

Aver ohne Koorten kummst du nich mehr torecht. Egaal ob bi de Sporkassen, bi´n Dokter un bi de

Bökeree: Fröher geev dat Karteikoorten ( ok al Koorten...), dor hett denn meist een öllered Fräulein

diene utlehnten Böker indragen un bi´n torüchgeven wedder utstreken. Nu geiht dat allens

automaatisch. Du packst dien Book ünner een Apperaat, de spuckt een Zedel ut un dor steiht denn

allens op. Nülichs kreeg ik eene Mahnung vunne Bökeree, angevlich harr ik een Book nich wedder

afgeven. Aver ik harr dat gor nich utlehnt. Un dat woll´n de mi nu nich glöven, de Technik maakte

keene Fehler! Gediegen, twee Weeken löter weer´t wedder dor....

Ik bün lestet Johr mit mien Shantychor in Holland wesen, dor geiht nix mehr ohne Koorten. Wi

seten mit veer Mann in Beergoorn un harrn bloots Boorgeld to´n betahlen - de Kellner konn us nix

rutgeven, hett he goot bi afsneern...anner Länner sünd in düssen Beriek veel wieter as wi.

De Lüüd bestellt ok jo jümmer mehr bi ,,Amazon". För denn lütten Handelsmann is dat grooden

Schietkraam. Aver hört jo dat maal an, denn köönt ji dat so´n beten verstahn: Ik brukte een lüttjet

Deel för mien Compjuter ( jo, so´n beten modern bün ik ok al ), de Sünnen schiende un ik mit Rad

na ,,Marktkauf", kott vör de Ochtum. De Bude is mi egentlich veel to groot. Eerstmaal an de

Utkunft de richtige Afdeelung utspekuliert, aver ik konn mien Deel dor nich finnen un brukte eene

Verköperin. So nöhm dat Drama sienen Loop...du denkst denn jo, dat de sick in vuller Afsicht

achter de Regaalen verkreepen hebbt. Keen Minsch wiet un siet to sehn! Een annern Kunde

meende, een Gang wieter stünd woll ein Telefon un vun dor ut konn man een Verköper anropen. Dat

weer mi to dösig. Vun wieten seeg ik denn een witten Kittel dör een Gang flattern. Ik flink

achterher. De Deern weer bloots för inpacken tostännig. Beten löter hett mi denn eene annere

Verköperin dat vun mi gesöökte Regaal wiest. Wat hebb ik mi freit, na fiefunveertig Minuten stünd

ik nu dorvör - un kott vörn Hartinfarkt. Vör mien Deel hüng een Slott! Mien Puls schööt op

hunnertachtig, kann jo woll allens nich angahn. To´n Glück weer dicht bi een Pingel un een

Veddelstünnen löter harr ik mien Deel in de egen Hännen. Bi ,,Amazon" geiht dat in twee Minuten,

du brukst nich uten Huus un billiger is dat ok noch. Aver is dat op de Duur richtig?

Falko Eggers