Eggers, Falko

 Fiete un ik seten in Fleger na Majorca. He harr een Slaappillen innahmen un bekeek sick nu vun binnen. De Stuardess kööm mit ehrn Wagen denn Gang langdruffelt un broch wat to eten. Dat geev Nudeln, Grööntüch un Schokolaadenpudding, allens fein in dörsichtige Folie inpackt. Harr ik mi man bloots een Mettwussbrot insteken...un de Aflaag an mien Sitz kööm mit de Knee in Konflikt, mien Beenwark weer veel to lang. Bi´n utpacken flöög glieks dat Besteek dör de Gegend un de Spageddies verdeelten sick op Fiete sien Schoot - man goot dat he an snorchen weer. Aver he füng in Droom an to snacken, wat wegen de slechten Swienspriese - siene Öllern harrn jo een Buurnhoff. Denn hebbt se denn Rest vun´t Eten wedder afrümt un ik hebb mi een Cola - Rum bestellt, denn brukst tominnst nich utpacken!

Na denn fieften Rum kööm de Ansaag vun Kaptein dat Majorca in Sicht weer un de Fleger nu to de Landung ansetten dä. Un jüst dor weer ik op´n Pott, dat weer ok een Beleevnis. Keen Platz noog un dat schüddelte mi hen un her, een Ansnallremen geev`t dor nich. Denn hebb ik de Spölung anreten un mi bannig verjaagt. Dat suuste achter mi as wenn een Waterfall unner mien Moors dör de Schüssel schööt! Nu geiht wat kaputt hebb ik dacht un bün Hals över Kopp torüch na mien Platz torkelt. Duurte nich lang un dat ruckelte orig - wi weern unnen!

Mit´n Maal sprüngen de Lüüd rund um to op un füngen an to klatschen. Wat schall dat denn? Is doch denn Kaptein sien Job dat de us heel an Bodden bringt. Ik bün jo nu Discher, aver bi mi hett nie nich een Minsch klatscht wenn ik een Finster insett hebb...villicht faalt jem ok bloots een Steen vun Harten, dat se nu doch nich in´t Water fullen sünd. Is ok schietegaal, Hauptsaak wi sünd nu an ,,Ballermann". De Fleger weer noch an rullen, dor füngen se all an mit ehr Bagaasch to rieten un strevten nah´n Utgang to. Ik lööt mi Tiet, Fiete slööp jo jümmers noch. Ik hebb em denn schüddelt und füng an to ropen:,, Fiete opstahn, wi sünd dor, nu gifft Rotwien uten Ammer!" Keen Levensteken vun em. Een Stuardess kööm anlopen un meende:,, Na typisch, konnte den Kanal wohl wieder nicht voll kriegen!",, Ne, ne, in Gegendeel du olle Spinaatwachtel, bring mi maal fix een Buddel Beer". Se keek mi dösig an, kööm denn aver mit Beer in een Pappbecher torüch. ,,Bi Fiete hölpt dat as bi anner Lüüd Rüksolt", meende ik un holl em dat Beer unner sien Nesen. He snüffelte un siene Klüsen füngen an to flattern. ,,Sünd wi al dor, dat rüükt so lecker", nusselte he sick in Boort. ,, Jupp, nu geiht los", freide ik mi un reet em an sien Arm na baven, af in de Sünn!

Vun wegen, dat weer um de Middagstiet un vör us leeg de Flegerhaven Palma - in Regen! Dat harr de Kaptein vörher ok al vertellt, aver ik harr dat wegen mien Klobesöök nich mitkregen. ,, Hebbt se us jo schön anscheten, in de Prospekten weer keen beten Regen to sehn un ik hebb keen lange Böxen inpackt", schimpte Fiete. To´n Glück harr ik ok Klamotten för Schietweer in mien Kuffer un brukte mi keen Gedanken to maken - noch nich.

Nu stünnen wi in Flegerhaven un tövten op`t Gepäck. Dat Band füng an to brummen un de ersten Kuffer wackelten an us vörbi. ,, Is jo wie fröher bi Rudi Carrel an lopenden Band, glieks kümmt dat Fraageteken", füng ik an to gnickern. Dat kööm nich, aver mien Kuffer ok nich. Fiete harr sick sien lütten Büdel grepen und ik keek inne Röhre. ,,Nu nützt di dien vullen Kuffer gor nix, ik hebb tominnst Tehnbuss un een Baadebüxen", trietzte he mi. Ik harr de Snuten nu al vull. Buten in Regen bi de Busse stünd us Reisleitersche. De hebb ik dat Mallör mit denn Kuffer vertellt und se meende, dat wat sick allens finden. Dat seht ji denn in August.