Eggers, Falko

 An een vun de lesten Avende rauhten wi us op usen Balkon ut. De Sünn, un jümmers bloots an supen, makt di op de Duur bannig bregenklöterig in Kopp. De Film in miene Knipskisten weer vull, besünners mit de nackeligen Froonslüüd, de Fiete klammheemlich unner sien Handdook aflicht harr, un ik woll em utwesseln, wuss aver nich genau wo dat woll güng. ,,Geev mi dat Ding röver, ik mak di dat flink trecht", sä Fiete un harr denn Apperaat al in siene Fingers. ,,Un du weetst ok wat du dor deist?", fröög ik em vörsichtig. ,,Kloor, ik hebb jo fröher een Praktikum bi Foto-Eickhorst in Erkshoff makt!" Un denn töög he denn Film suutje rut...de sößundartig Billers kunn ik denn wegsmieten. Dat mit dat Praktikum harr he sick utdacht, aver dat schull he noch beduurn...

Morgens, een Dag löter, ik seet al an de Poolbar, kööm Fiete ansockt. ,, Minsch, wat geiht mi dat goot vondaag un dorbi is dat eerst Klock negen!" ,,Vun wegen, dat geiht op Klock een to, ik hebb al wat to Middag eten", stekte ik em. Sien Klock güng verdwars un twee Daage löter weer dat nich anners, obwoll he se stellt harr. Denn dritten Dag is he bold dördreiht, he bölkte: ,, Dat Schietding schuuf ik denn Klockenmaker Mahlstedt in sien Hals, hebb ik domaals een Bult Geld för utgeven un nu so wat!" Denn vertellde ik em, dat ik de Klock inne Nach jümmers trüchstellt harr, bit avends hett he denn nich mehr mit mi snackt...

Nu weert al düüster un wi wullen jo noch wat beleven. Wi rin in´t ,,Bavaria", dat weer een Danzlokaal in een Keller mit Kapell. Glieks ran an Tresen, Fiete harr al beten vörgläut un frög denn Kröger, ob he denn woll ok een ,,warmen Mackenstedter" harr. ,,Woas is denn dess für a Gsöff", antwoorde he. Ik hebb denn twee Beer un dorto twee Jägermeester ordert. Vun Pries snackten wi nich un all halve Stünn rullde eene nee Rund an. Hüüt geev´t dor een Wettbewarv. Dat güng um Tuba spelen un wo een de mehrste Ünnerwäsch vun de anwessenden Froons inkasseern kunnt. Fiete sprüng glieks op un mende: ,,Dat steiht mi goot to Gesicht" un lööp op de Bühn. He reet denn Ansaager dat Mikro ut de Hand und rööp: ,,Ik bün Fiete, Buur ut Karkwey und gewinn denn Schiet hier!" De Lüüd lachten sik nu al kaputt...Veer annere Jungs weern dor ok noch mit bi. Nu schull Fiete Tuba spelen. He puuste rin, sien Kösel lööp rot an, de Klüsen warden jummer grötter - un keen Ton to hörn. ,,Dor hett woll Een wat rinsteeken",meckerte he. Bloots gediegen, bi de Annern klappte dat...Denn schull dat de Froonslüüd an de Wäsch gahn. För een Bossenholler geev´t een Punkt un för Ünnerboxen fief. Fiete rennde Hals över Kopp in´t Publikum un brüllde: ,,Her mit de Böxen, mit Kleenkraam geev ik mi ne af!" Nu kregen de Froon dat mit de Angst to doon un de grötste Deel verkrööp sick op Klo. Fiete is denn op Platz fief land...un denn kööm noch Jürgen Drews um de Eck, hett mit Fiete denn ,,Een Bett in Koornfeld" sungen. Dat Foto von de beiden backt in mien Album! Um dree weer de Bude leddig un wi vull. Nu güng´t an´t betahlen. De Piesel hörde gor nich op to reken, denn sä he: ,, Zweihundertsechsundzwanzig Mark, da habst aber gut getankt!" Mit een Slag weern wi wedder nochtern, een Jägermeester koste söß Mark! und dat weer in de achtiger Johren. As Männers vun Welt hebbt wi em denn tweehunnertdartig geven.

Bin Hotel hebb ik denn noch op de glibberige Kant vun denn Pool ballanzeert un bün rinfullen, nu weer ik wedder richtig kloor un kunn ne slapen. Fiete leeg neven mi un snorchte as so´n Waterbüffel. Ik hebb em denn een vun sien stinkigen Socken op sien Nees packt, hett em aver ok nix utmakt.

Een Dag löter güng´t denn wedder na Huus hen. Dat gifft noch veel mehr to vertellen. Glövt man nich, dat ik mi dat allens utdacht hebb. Snackt maal mit Axel, Bernd, Heiner, Heino un Jürgen, denn weet ji Bescheed!