Eggers, Falko

 Domaals in de achtiger Johren weern wi jo jümmers veel ünnerwegens. Sünnavends bi Klock acht avends, hebbt wi us bi Schomaker in Melchershusen drapen un nadem wi utklamüüsert harrn wo een nu föhrn schull, güng dat los. To´n Glück makten dat denn meist de Deerns, wi Jungs harrn us jo faken vörher al een rinpietscht...

Sümmerdaags mitünner to´n Schützenfest un Freeluftfetens, in Winter Disco un Landjugendball bi Lüdeke in Nordwohl. Vör Klock dree funnen wi keen End. Aver wenn du veel drinken deist, fangt ok maal de Buuk an to grummeln. Af un an harrst di vun de Superee ok twüschendör al övergeven un de Pansen weer leddig. Denn güng dat to´n Spegeleier eten. Dütmal harr dat Hilmer in Sekenhüsen drapen. Wi weern wull so bi teihn Mann, Sluck un Beer stünd ok op´n Disch un de Eiers smeckten us allerbest. De Köken seeg nu ut as nah´n Bombenangriff, aver de Slaapstuuv vun de Öllern leeg een Stockwark höger, so dat se us nich hört hebbt.

Vun Möödigkeit bi us keene Spoor, wi wull´n noch wat utfreten. De leste Buddel Rum güng to Neige un wi sinneerten wo wi denn Naschub herkregen kunnen. Axel vertellde maal. dat se bi jem to Huus een Swien mit Naam ,,Hans" inne Garaasch harrn. För slechte Tieten meende sien Vadder. Obwoll, een Buur weer he nich. Axel leeg düssen Avend al duun in sien Bett, toveel Aquavit.

To de Tiet worrn mitünner noch rieke Minschen för Lösgeld entföhrt. Worum denn nich ,,Hans" klaun un för em een Buddel Rum insacken? He wohnde jo bloots twee Straten wieter....

Mien Infall kööm bi de annern goot an. Aver wo schull dat gahn? Wi weern jo anstännige Lüüd, keene Verbrekers un wussen in Saken Swiensklau nich Bescheed. ,,Hans" eenfach anne Lien kriegen un to Foot na Hilmer lopen un em inne Schüün inbuchten? Teihn Mann mit een Swien in Düstern dör´t Dörp? Un wenn us een süht? Een Breef mit us Forderungen brukten wi jo ok noch. Aver Hilmer harr een Vehanhänger, bloots wo een schull denn Trecker föhrn? Vun us weer jo keen mehr nochtern. Utlosen weer de Lösung, Buddeldreihn mit de leddigen Rumpullen. Heiner hett dat denn dropen, tofällig harr he ok an wenigsten drunken. Dröffst vondaag keen mehr vertellen...un denn de Breef. De Wöör ut een Zeitung utsnieden wohrte to langen, aver Hilmer harr noch een ole Schrievmaschien, de güng ok. Ik schreef: ,,Wi hebbt Hans, wenn ji em in een Stück torüchhebben wüllt, denn verstekt bit Klock twölf Middags twee Buddel Bacardi bi de groode Eken achter denn Bunker anne Erikastraten. Un keene Schandarms, denn stekt wi dat Swien af." Keen Unnerschrift.

Denn sünd wi losföhrt. Dree Mann op´n Trecker, de Rest in Hänger. Bi Axel weer allens düster un nix tö hörn. Denn Breef hebb ik bi jem unner een Steen vör de Huusdöör packt. Nu flink un lies na ,,Hans" sien Garaasch hen. Weer afslooten, aver de Slötel stekte. ,,Hans" leeg op Stroh inne Ecken un weer an snorchen. He kööm aver flink togange, denn mit so veel Besöök inne Nacht harr he jo nich rekt. Mit een Appel hebbt wi em denn wat luurt un he druffelte suutje achter us an. Wi hebbt em in Hänger rinschoven, Klappen to un af na Hilmer. Dor hett he wat to freten kregen un wi sünd denn een nah´n annern na Huus henwackelt. Weer ok Tiet, dat güng op Klock söß to.

Ik weer noch nich lang in mien Bett, dor pingelte de Sabbelkasten. Axel weer an annern End un sputterte opregt, dat se ehr Swien klaut harrn. Sien Vadder stünd kott vörn Hartinfarkt un harr de Kripo anropen! Ok dat noch. Dorbi stünd nu utdrücklich in denn Breef keene Schandarms! Aver de Breef weer över Nacht wull wechweiht, so´n schiet. Ik mien Rad grepen, flink na Axel henföhrt, em de Wohrheit vertellen. Vun Wieten seeg ik al de Koor vun de witten Müüs....to´n Glück harrn de Jungs Humor un hebbt mi nich utschimpt. Un Axel sien Vaddern hett denn noch een utgeven!