"Wenn ik nu de Karkweyher Stroot'n, de an de historischen Stäärn vorbi geiht, no Drey toföhr, bün ick bold an de Ocht'n, wo rechts de Kark-weyher See (Borgsee) up'e Landkoort steiht.  Links von de Brügg nimmt de Ocht'n ehr'n Anfang, de bi Vegesack, 30km wieter in de Werser geiht. 
Hier were de Ocht'n all bitt up twee km an de Werser ran'n.

 De Ocht'n hett to all'n Tiet'n to dat Urstromtool von de Werser höört, de von doog von de Hache, den Süstedter Bach un de Weyher Beek dat Woter kriggt.

Hier vör de Ocht'n is links de Stäär, wo de Groot'n ehre Ver-sammlungen afholen hebbt, un villicht ok de Gerichtsstäär weer. Vondoog ist dat blooß noch de Koppel, wat soveel heet as Landstuck'n. 
Dat eene weet wi ober, dat de Koppel woll de öllste Siedlung von Karkweyh mit is. 

Up'e Ocht'nbrügg mutt ik denken, wi hett dat hier woll vör fiefhunnert un noch mehr Johrn utsehn, as dat noch keene Brügg geev. Dat steiht narms schrewen, wann de Brügg boot wudd, un ok de Stroot'n no Drey plostert is. Lange Tiet'n hebbt de Luer mit barwden Fööt dör de Ocht'n moßt, oder se sünd mit'n Peerwogen bi sachten Woterstand an dat annere Öwer komen.

In'n twolften Johrhunnert is denn Heinrich de Löwe komen, un hett dat sehn mit dat natte Land. He mutt goe Gedanken hard hebb'n, dat mit den Bodd'n hier wat antofangen weer. Dor moß bloß de Nattigkeit rut. 
Wiel de Minschen in Holland al to de Tiet to wenig Lann harrn, ober mit Woter un Diekbo um-gohn konnn, het he jem dat "Wegeri" und dat "Brinskimi-brook" gewen, se mocht'n sick dat updeelen un drööglegg'n

Ob hier die älteste Siedlung gewesen ist, kann man nicht mit Bestimmtheit sagen. Man hat am Rieder Umleiter , am Fried-hof und auch auf dem Geestfeld alte Urnen ausgegraben. Sie stammten meist aus der Eisenzeit oder aus der Röm. Kaiserzeit. In Ahausen hat man auch was aus der Steinzeit gefunden.

Son richtiget Wunner is dat, wenn man de Stroot`n no Drey lang föhrt, wi de domols al de groten Kämpe upmeten un intühnt hebbt mit de hogen Knicks.up'n Gliek rechts geiht de erste Gang af, wo up en Siet de Kämpe an See scheet, un up'e anner Siet ganz dör bit an'n tweeten Gang, wo in'e Mitte in'n, de Felsensee liggt. Ok dat weer sekerlich 'n Werserarm. 
Wenn de Wittdoorn in'n Vörjohr bleuhen doot, driggt de Wind den herben Geruch no'n Dorp to. Genau so herb weern de Minschen, de düsse Landschap formt harrn. Se weern ober to bruken, wenn Not anne Mann träärn dä.

Dreye

In Drey koom ik an de Landes-stroot'n, de von Hoya no Bre-men geiht.  Dor, up'e Eck, an de linken Siet steiht de ole Dreyer School, wo vondoog nich mehr unterricht ward.

De Dreyer Füürwehr droff sick dat utboon. Se hebbt dor ehre Gerätschaften, un ok'n Kame-radschaftsroom. Hebbt dat meist all in Eegenleistung mookt.

Dat mutt noch seggt ween, dat dat lütte Dorp Dreye al 1798 ein eegen School hatt hett, de de Buurn unnerhol'n mossen, wo dat bloß acht von geew. De Schoolmasters sind von Hus to Hus, rehum, Eet'n gohn.

As do twee Fobriken, eene Seepenfbrik un eene Sogeree mehr Arbeiters no Drey tögen, wudd ok'n Schoolmester-wohnung boot. 

Weil de School in Drey jummer keen Geld harr, hett in Johr 1857, Blom'n Buur 500 Doler in de Schoolkasse gewen. Um 1900 ru'n geevt dat in drey 45 Fomilien mit 345 Inwohner. Ok eene Witwe Brüning hett in de Schoolkasse 300 Doler gewen, dat de School sick bit 1900 got over Woter holen konn. Vondoog het Drey keen School mehr. De Kinner ward in Karkweyh inschoolt, un komt loterhenn denn uk in de KGS no Leeste.

Wenn wi bi dat ole Schoolhus ober de Stroot'n goht, de von Hoya no Bremen geiht, stoht wi bi dat ehemolige Koophus von Heinrich Kaufmann Dreye. 
Wenn in fröhern Tiet'n de Buurn ut'e Stadt keem'n, hebbt se bi Kaufmann utspannt, un all son Bedarfsartikel, von Broot bit t de Seep'n, bi Kauf-mann inkofft. Dat weern Koophus, Bäckerei und Gast-wirtschupp.
Pottjeree, Nogels, Drooht un Speelworen geew dat ok bi Kaufmanns. Vondoog gifft dat keen Koopman Kaufmann mehr.

Use Weg geiht den smalen Weg dool, de up'n Diek geiht. 
Von hier ut kann man de Werser, wat de natürlike Grenze von Weyhe is, in vuller Bredde sehn.
Vörgelogert is noch de Dreyer Marsch, de woll all veel Hochwoter sehn hett. Dat Woter is hier foken obern Diek lopen, wenn de Snee in'n Horz un in de Mittelgebirge smolten dä. Wo foken hebbt de Dreyer Buurn mit de Füürwehr tohoop, Diekwache moken moßt. Foken mossen uk de Karkweyher Buurn noch helpen.

Toerst wudd'n bi de Stormfloot de Diekscharte afschott't mit Hooltplatt'n. dat weer dor, wo de Diek öberweegt wudd. Denn mössen Sandsäcke proot ween, um an veel'n Stäärn uttoflicken, wie man sä.

Dat leste Hochwoter geew dat 1981 in Märzmond, wo in Habenhusen, bloß 2 km von hier, de Sommerdiek broken is. Dat Woter hett mit gewaltigem Druck sik'n nee't Bedd socht, un hett veertig Hektor Buurnland in 17m Deepte in den Bremer Werdersee spööllt. 
Wenn dat hier nich passeert weer, un dat Woter harr sick kee'n Weg socht, weer de Diek achter Thegenhusen, bi Intschede broken, un de ganze Wersermarsch harr groten Woterschoden hatt.

Up'e anne Siet von de Werser seht wi den Hemelinger Hoben, wenn wi link kieken doot. Up de Werser is to jede Dogestiet Frachtverkehr mit Sleper un Bockschippe. 

De Tollhus to Lan'n stun an de Bremer Grenze, un weer Drey Nr. 1. De Tollhus to Woter weer dor, wo man vondoog noch den Tollhoff to seggt. Dor is loterhen de Dreyer Hoben ween. Veel Wore wudd doe umslogen un ok hannelt. 

Bi'n hoben, an de olenWeser, kummt man up de Insel, wo de eerste Tegelee von Drey wesen is. Dor is de Bedreev gliek no'n ersten Weltkrieg instellt wurrn.Eenige Gebäude hett man noch lange Johrn sehn.

Achter de Insel koomt we erst an de grote Werser. In ganz fröhen Johrn, um 1700 bitt 1850, hett Drey de Luer ton Treideln stellt. Düsse Luer mössen de Schippe mit lange Reepe de Werser hochtehn. Loterhen wudd'n dor Peer to nohmen. Dat gung so lange bitt de Moto de Schippe andriewen konn.

Dat Dorp Drey is toerst noomt wurrn in'n 13.Johrhunnert, wo ein Gerhardus von Dreye noomt ward. Man weet over nich, wor de wohnt hett.
 
In 16.Johrhunnert harrn de Grofen von Hoya, wiel se jummer in Geldnoot weern, den Woter- und Strootentoll an en Dr. Egeling in Bremen ver-pfändt.

Dat weer eenmol de Insel-tegelee, de von Brüne und Meyer un Wetjen ut Sudweyh bedrewen wudd, un denn de Tegelee von Ahrens, de an de Bremer Stroot'n an de Bremer Grenze stun.
De lesde, de von dooge noch bedrewen ward, ober an dat Dorp Sudweyh höört, is deWehrmannsche Tegelee. Von-doog is een H.H.Meyer Besitter. 

Twee wietere schööt hier noch noomt ween. Dat wer Kopps Tegelee in Sudweyh un de von Ötjen in Ausen. 
Wiel de Lehm weniger wudd, hebbt de meisten, bitt up eene, den Bedreew instellt. 
 

Mit den Dreyer Weserkies hett Drey ok'n goen Noom. Dor steiht de Noom Bultmann för. 
Watt de Broor von Hans Bultmann is un Fritz heet, de hett ut'n Werserbedd den Kies baggert, un de Broor Hans hett'n dann verkofft. 
Loterhen hett Hans Bultmann unnern Wieltbarg Kies fun'n. He hett sick dann Genehmigung hoolt, un hett den Kies deep ut'n Bodd'n hoolt mit groote Suugbaggers.

Dor is nu de Wieltsee un Wielthoben entstohn. Vondoog hebbt dor vel Freetietkapitäne mit ehre Schippe ehre Heimot. 
De Kiesentnohme geiht jummer noch wieter, wenn ok dat Boen tietwiese weniger wurrn is. 
Nu steiht dat eene Kieswark von Bultmann in Drey vörn Diek, un dat Annere an de Bremer Grenze an de Werser. Dor weert Bockschippe ledig mookt.

De Freetietschipperee hett in Drey'n goot'n Noom, wiel de Werser sik dor so schöön anbeern deit. 
Ok veel Schipverköper hebbt all Sorten to verkööp'n

Wiel wi nun al von de Insel vertellt hebbt, geiht de Weg wieter up'n Diek dool, de so schön as Spazierweg von de Gemeen treggmookt is. Links loot wi da schöne Werserbedd mit de olenWerser leggen, wo in Sommer ok de Dreyer ehre Bodeanstalt is. 
Rechts köönt wi den Maschinenhoff wohrnehmen, wo ok al in Drey Fobriken bedrewen wudd'n. Dor geew dat eene Holschen- un ok'n Seep'nfobrik, un noch veel wat anners.
Wi köönt von Diek ut in de geplegten Goorns rinkieken, wo de Dreyer al von sleew her de besten Erdbeern harrn. Use Weg geiht sowiet, bitt de Weg von'n Diek runner geiht, no'n Wieltsee to. Wi loot den See links leggen,un böögt achter links an'e Werser ran. 

Wi btracht us noch mol die Suuganlogen, wo de Kies in dat Wark von Bultmann puußt ward. Jummerhen 500 m sind datt. Un man segg, dat de See al ober 20 m deep is. De Arbeit geiht jummer noch wieter. Un noch wat is interessant. Man hett mit den Kies ok Knook'n hochhoolt von Dinosauriern und Seeelefanten.
Dat hett de Archeologen uphorchen loten.Man slutt dorut, dat düsse Tiere vör Hundertdusende von Johrn hier al in use Heimat leewt hebbt, un mit de beiden Iestiet'n, de de Welten jummer weer verännert hebbt, in dat groote Urstromtol von de Weser um'nkomen sünd.
Dat segg us ober uk, dat de Weserloop ganz anners gohn is,dat de Iestiet dor sone Sandbank henspöölt hett, wo de Tiere in umkomen moss'n, ober ok good konserveert wudd'n.
Wat do wol noch all'ns an'n Dag kummt ? In use Tiet, mit ll de Technik, kummt de Bewiese wedder to'n Vörschien! So kann man hier wol von historische Tügen snack'n. Minschen hett do sekerlich noch nich geewen.
 

So stoht wi hier vör den Dreyer Jagdhoben, de Hans Bultmann jem mookt hett, un de jummer noch grotter ward. Dör so'n lütt Lock köönt de Schipper flink up de Werser komen. 
Hier ist dat een Gemeen-schupp.Grote un lütte, düre un billige Schippe kann man hier sehen.Jedet Schipp hett sien Anleger, wo man up Hoolt-planken an Land komen kann.
Hier ward de unnergrund von de Werser to Geld mookt. För alle Tiet'n is de Acker- und Graswirtschupp to En'n, wo dat Hochwoter al 2000 Johr un länger den Slick aflogert harr.
Dor weer den de Lehm un Tonbodd'n von wurrn, den sik de Tegeleen sichert harrn, wo de schöön'n Rootsteeen von mookt wurrn sünd. So ward de ganze Marsch verkofft, un dat Woter, wo de Baggersee nun al 20 Hektor grootwurrn is, bringt noch för alle Tiet'n Geld in'e Kasse, wat de Freetiedkapitäne betohln mööt.
 

Ik bün dor andool föhrt, an all de Loopstege, de an de Jollen un Motorschippe rangung'n. Tellt hebb ik jem nich. Heb mi ober segg'n loten, dat de Nohfroge no Anlegeplätze jummer noch anholen dä.

Up'n Auser Marschdamm
 
Wiel de lüttje Jagdhobenkonol mi nich dörlett, mutt ik ganz um den Wieltsee umto, un bün nun an de Auser Marsch 
Up de anner Siet von de Weser kann ik dat Dorp Bollen sehn. Bi kloren Wedder, beet'n wieter achterto, dat Dorp Mohndorp, wat al wedder to Bremen höört. To dat Vörland von de Dörper seggt man Grummenstreek. Dat hett woll so veel to seggen, dat dor goe Gram'n wassen deit. 

Mien Weg geiht up Ausen to, wo up een'n Kamp no'de Werser to en Bremer Hun'nvereen so'ne needmodsche Rennbohn hett. Tweemol in Johr fin'dt dor Hun'nrennen statt, wat ok so'n Volkssport wurrn is. Richtige lüttje Hürden hett man dor upboot, wo de Hün'n ok roberspring'n mööt. Wer harr dacht, dat Hün'n ok noch mol up'e Rennbohn mööt. 
De Minschen willt eern Spooß hebb'n, goht no'n Swienerennen ok jo hen.
Wenn ik hier so de Werser doolkiek, hebb ich rechts dat Bollerhoolt, wo de Werser den grooten Bogen mookt. Dat Fluurstuck is noch bitt vör hunnert Johrn von Boller Buurn bewirtschaft wurrn. Dat is ok'n Teken, dat de Werser den Lopp verännert hett. 
Hier is dat in März 1981 wesen, as dat Woter ut de Barge komen is, dat de Diek broken is. Do is de ganze Marsch vullopen, un hett groten Schoden achterloten. Up de Rieder Siet hett man dor vondoog 'nen schönen Campingplatz, wo wi ober noch henkoomt. 

Ik föhr den Weg wieter, un koom vör Ausen an'n Diek, wo mi de Diekweg in dat Buurndorp Ausen bringt.
De erste Hoff is de Hoff mit den Huusnoom Diekmann , wat woll so veel seggt, dat de Vörfohren fröher wat mit den Diek to doon harrn. 
Dat geew jo Diekgrofen un Diekhauptluer. Vondoog be-steiht blooß noch de Husnoom. Dat lange Buurnhus hett sich en Doktor fein herricht.

Bitt ton dartigjährigen Krieg hett Ausen mit de poor Buurnhöve, noch'n lüttje Kapelle hard, wo e Karkweyher Paster ton Predigen hen moß. 
Bit in use Tiet hett Ausen ok'n lüttje School harrd. Ausen is dat lesde Dorp an de Grenze ton Kreis Verden, un ok ton Regierungs-bezirk Stade.

Mien Weg geiht wieter up'n Diek, bitt Ratswiehe, wo dat Dorp Ausen up'e rechten Siet legen blifft. 
Hier liggt ok de Hoff von Ötjen, de vörn tweet'n Weltkrieg, up'e anner Siet von de Stroot'n noch de Tegelee bedreew.

Hier koom ick an de ole Werser, wat de Forschers seggt, datt hier noch vör veerhunnert Johr dat ole Flootbedd von de Werser wesen is. 
Dat kann man ok dorut sluten, dat de Hööw Ratswiehe un dat Goot Schlieme noch no Uphusen to Kark mossen. De beiden Hööwe leegt butendieks, un sünd up hoge Warften boot.

Wi willt us'n Ogenblick ok son beet'n de Noberschupp ankie-ken, wiel dat dor so schön is. 
Wenn wi links an den Rats-wieher Hoff vorbi koomt, wo bitt tolesd noch en Riekers wohnt hett, un wo man Jan Butendiek to sä, wat sovell heten dä, dat he ok butendieks lewen moß, un jede Wotersnoot to spöörn kreeg.

Düsse Weg geiht bit an de Werser, wo vondoog so'n schöön'n Campingplatz is, so ganz in'e Stille. 
Dor weer ok de Fähre to dat Dorp Bollen up'e annern Siet. Wer mol so richtig in Rauh bliewen well, de schall sik dor henmoken. So mannigeen Vogel kann man in de stillen Marsch noch beobachten.

Wi hebbt al von de Schööp snackt, de an'e Werser den Wieltbarg afgrooßt hebbt. De Mittelweserverband hett al lange Johrn en Scheper in Schlieme den Diek, von Thegenhusen no Bremen, ton Afgrosen oberloten. De Schööp schöölt den Diek kohl worrn un ok faßpedd'n. Dat sünd woll an dedreehunnert Muttertiere, de de Scheper dor dörkriggt. De Schoopstall steiht in Schlieme, an'n lang'n Jammer. Wenn wi nun wedder up de Landstroot'n stoht, dann steiht up'e annern Siet dat erste Huus von Rier in'n Kreis Verden, de Gärtneree von HartjenOrtmann. Fröher weer dat mol'n Wirtschupp, de in'n tweeten Weltkrieg upgewen wudd.
 

Wenn ik nun de Stroot'n doolkoom, hebb ik up'e rechten Siet de Franzosenkuuhln, de den Noom woll in de Franzosentiet, um 1800-1810 kregen hett. Dor schööt sik mol eenige Franzosen versoop'n hebb'n, de in'n Ies inbroken sünd. Ik loot hier dat Dorp Ausen rechts lig'n, un koom links an de Auser Siedlung, wo de Tegelee von Ötjen stohn hett.

Mien Weg geiht wieter. Ik lot de Auser Wirtschupp, wat fröher mol Turner weer, rechts ligg'n, un koom tweehunnert Meter wieter an den Weg, de links in de Wischen geiht. 
Dor ganz up'n En'n kann man noch'n Werserarm sehn, den schönen Riedersee. Uk dor kann man bi schöön'n Wedder ruhige Stunn'n verlewen. Ganz on Bööhm'n infoot, un up'n Woterspeegel vuller roe Seerosen, de doch so sporsom wurrn sind.  Veel Vogels hebbt dor noch'n Paradies. De See heet Rieder See, liggt ober up Sudweyher Siet. De Weg dor andool loppt sich doot. Ok hier sünd veel Kämpe aftegelt, wat 

Use Weg geiht wieter up Sudweyh to, wo wi ober de Brügg von den Süstedter Bach koomt, o an'e rechten Siet de ole Sudweyher Gemeen dat schöne Denkmol hensett hett, för de Gefallenen von twee Weltkriege.